રાજકોટની વાયબ્રન્ટ સમિટમાં રોકાણ – રોજગારી પર ફોકસ : કેબીનેટમાં સમીક્ષા

વડાપ્રધાનની હાજરીમાં યોજાનારી સમિટ વિશે મુખ્યમંત્રીએ માહિતી આપી : તૈયારીમાં કોઈ કચાશ ન રાખવા તંત્રને તાકીદ

ગાંધીનગર તા.18
રાજકોટમાં આગામી 10-11 જાન્યુઆરીએ યોજાનારી સૌરાષ્ટ્ર-કચ્છ રીજનલ વાયબ્રન્ટ ગુજરાત સમિટની તૈયારીની ચર્ચા સમીક્ષા કરી હતી. નવા રોકાણ તથા રોજગારીની તકો પર ફોકસ રહે તેવા સંકેત છે.

આગામી 10 જાન્યુઆરીથી રાજકોટ ખાતે યોજાનારી વાયબ્રન્ટ ગુજરાત રીજનલ સમિટ અંગે રાજય સરકાર દ્વારા કરવામાં આવેલી તમામ તૈયારીઓ અને આયોજનની મુખ્યમંત્રીએ તલસ્પર્શી માહિતી મેળવીને સમીક્ષા કરી હતી સાથે જ તેમણે આ સમિટને વધુ સાર્થક બનાવી સામાન્ય નાગરીકો માટે રોજગારીની નવી તકો ઉભી કરવા માટે વહીવટી તંત્રને અત્યારથી જ સજજ થવા સુચના આપી છે.

અત્રે ઉલ્લેખનીય છે કે, રાજકોટ ખાતેની વાઈબ્રન્ટ સમિટનું ઉદઘાટન વડાપ્રધાન નરેન્દ્ર મોદીનાં હસ્તે થનાર છે. તેને ધ્યાને રાખીને ભરચકક તૈયાર કરવામાં આવી રહી છે. વડાપ્રધાન ઉપરાંત અનેક દેશોના રાષ્ટ્રવડાઓ તથા અદાણી-અંબાણી જેવા ટોચના ઉદ્યોગ સાહસીકો પણ સામેલ થવાની સંભાવના છે. ગાંધીનગરમાં યોજાતી રાજયકક્ષાની સમીટ જેવી જ રાજકોટની સમીટ હશે તેવા સંકેત છે જેમાં કરોડો રૂપિયાના રોકાણ એમઓયુ-કરાર થશે.

રાજ્યના નાગરિકોનું હિત અને સર્વાંગી વિકાસ એ ગુજરાત સરકારની કાર્યશૈલીના કેન્દ્રમાં છે, તેમ જણાવતાં પ્રવક્તા મંત્રીએ કહ્યું હતું કે, રાજ્ય સરકાર દ્વારા નાગરિકોના હિતમાં અનેક મહત્વના નિર્ણયો લેવામાં આવે છે. આ જાહેરાતો અને નિર્ણયોનો લાભ રાજ્યના છેવાડાના નાગરીક સુધી સુયોગ્ય રીતે પહોંચે તેની ખાતરી કરવાની જવાબદારી વહીવટી તંત્રની છે.

સરકાર દ્વારા લેવાતા દરેક પ્રજાલક્ષી નિર્ણયો અને દરેક યોજનાનું સત્વરે અમલીકરણ થાય તે માટે મુખ્યમંત્રીએ કેબિનેટ બેઠકમાં સૂચના આપી છે. આ ઉપરાંત કોઈપણ પ્રજાલક્ષી નિર્ણય બાદ તેમાં કોઈપણ પ્રકારના વિલંબ વગર ત્વરિત અમલીકરણ કરવા પણ જરૂરી સૂચનાઓ આપવામાં આવી છે.

મુખ્યમંત્રી ભૂપેન્દ્રભાઈ પટેલની અધ્યક્ષતામાં ગાંધીનગર ખાતે મળેલી રાજ્ય મંત્રી મંડળની બેઠકમાં ચર્ચાયેલા મહત્વપૂર્ણ મુદ્દાઓ અંગે માહિતી આપતા પ્રવક્તા મંત્રી જીતુભાઈ વાઘાણીએ જણાવ્યું હતું કે, કેબિનેટ બેઠકમાં મુખ્યમંત્રી ભૂપેન્દ્રભાઈ પટેલ તથા તમામ મંત્રીમંડળના સભ્યોએ અમદાવાદની 14 વર્ષની દીકરી માહી ભટ્ટની ગૌરવશાળી સિદ્ધિને બિરદાવી હતી.

સરકારી શાળામાં યોજાતા વિજ્ઞાન મેળામાં રસપૂર્વક ભાગ લેતી આ દીકરીએ વૈશ્વિક સ્તરે ગુજરાતનો ડંકો વગાડ્યો છે. અમદાવાદના વસ્ત્રાલ વિસ્તારની AMC સંચાલિત સરકારી શાળામાં અભ્યાસ કરતી સામાન્ય પરિવારની આ દીકરી માહીને `નાસા સ્ટેમ’માં ગાઈડ તરીકે આમંત્રણ મળવા બદલ મુખ્યમંત્રી સહિત સમગ્ર મંત્રીમંડળે દીકરી અને તેના પરિવારને અભિનંદન પાઠવ્યા હતા.